📚Celebramos o Día das Bibliotecas Escolares!

Hai días que nos lembran por que os libros ocupan un lugar tan especial no noso cole. O Día das Bibliotecas Escolares foi unha desas ocasións para compartir lecturas, descubrir novas posibilidades e seguir construíndo, entre todos e todas, unha comunidade arredor da biblioteca.

A xornada comezou coa proxección dun vídeo do Ministerio de Educación dedicado á importancia dos profesionais das bibliotecas, persoas que acompañan, orientan e facilitan o acceso á lectura e ao coñecemento. Porque detrás de cada biblioteca hai moito máis ca libros: hai persoas que dan vida aos espazos, crean oportunidades e espertan o gusto por ler.

🎒As mochilas viaxeiras emprenden unha nova aventura

 Un dos momentos máis agardados foi a entrega das mochilas viaxeiras ao alumnado de Educación Infantil ata 4º de Educación Primaria.

A partir de agora, os libros viaxarán ás casas para compartir historias, descubrir novos mundos e converter a lectura nun momento de encontro entre pequenos e maiores.

Porque cando un libro entra nunha casa, tamén abre unha porta á imaxinación, á conversa ao pracer de ler xuntos. ❤️

🐿️Efrén ten algo que contarnos...

A nosa mascota, Efrén, tamén quixo acompañarnos nesta celebración. Tiña unha mensaxe importante que compartir: a biblioteca está pechada temporalmente porque estamos reorganizando o espazo para que funcione aínda mellor.

Estamos traballando para preparar unha biblioteca máis funcional e acolledora. Un lugar onde seguir descubrindo historias, investigando, creando e compartindo aprendizaxes.

Pero Efrén non veu só explicar os cambios. Aproveitou a ocasión para inaugurar un novo espazo no ximnasio!

🎲Un novo recuncho para ler, xogar e compartir

O ximnasio conta agora cun novo recuncho que combina lectura e xogos de mesa. Unha estantería con libros e varias mesas preparadas para gozar de momentos de lecer, compartir partidas e descubrir que tamén se aprende xogando.

Un espazo que amplía as posibilidades de achegar os libros ao alumnado e que nos lembra que a lectura e a aprendizaxe poden estar presentes en moitos lugares do cole, non só dentro da biblioteca.

✍️ Unha visita moi especial: Alberto Boo, un escritor da nosa contorna

Nesta celebración contamos cunha visita moi especial: Alberto Boo, escritor e veciño do noso concello, que se achegou ao noso cole para presentarno o seu libro e compartir connoco a súa paixón pola literatura.

Despois da presentación, o alumnado de Educación Primaria participou en diferentes obradoiros. Foi unha oportunidade para descubrir novas historias, espertar a curiosidade e coñecer de preto a un autor da nosa contorna. 

Grazas, Alberto, por compartir con nós esta xornada e axudarnos a seguir enchendo o cole de historias e ilusión pola lectura! 📚💚

💚A biblioteca segue viva!

Aínda que as portas da biblioteca permanecen pechadas mentres preparamos a súa reorganización, a actividade arredor dos libros non se detén. As mochilas viaxeiras continúan o seu percorrido, os novos espazos comezan a encherse de vida e as propostas lectoras seguen abríndose camiño no noso día a día.

Este celebración deixounos unha mensaxe moi clara: unha biblioteca non é só un lugar onde se gardan libros, é un espazo construído polas persoas que a fan posible, polas historias que compartimos e por todo o que aprendemos xuntos.

Seguimos traballado con ilusión para que a nosa biblioteca continúe sendo o corazón do CEIP Saco e Arce.