Os Bolechas ElectrECOs

Os Bolechas Electrecos están a visitar moitos coles de Galicia para falar da reciclaxe de RAEE. 
Ah, que non sabedes o que é iso!
Claro, vós non estivestes na nosa biblio o día 18, e por iso non o sabedes...
Son Residuos de Aparellos Eléctricos e Electrónicos. 
Vos que facedes cando se vos "morren" o ordenador, o teléfono ou a lavadora? 
Deixádelos abandoados na rúa ou no monte? Tirádelos ao colector co resto do lixo? 
Iso é o que fai moita xente, pero non é o correcto porque levan substancias perigosas que contaminan a terra, a auga e o aire.
EcoLoli ensinounos o que hai que facer con eles, porque teñen materiais moi valiosos que se poden reciclar para facer outras cousas. 
Mirade o ben que o pasamos na biblio:

E ti.. a quen tes no teu corazón?

O amor romántico está pasado de moda!
A amizade é unha parte moito máis  importante da nosa vida.  É un sentimento común a todos os seres humanos.  Os amigos veñen en todas as formas e tamaños  e ofrecennos cousas diferentes. Están presentes nos bos e nos malos momentos.

 E o máis importante: fannos felices!

Moi poucas veces nos decepcionan!

Repartimos corazóns
Nas aulas, decoramos corazóns, escribimos mensaxes  de amizade e repartímolos entre todos os compañeiros:

Amizade by Slidely Photo Gallery

Tamén vimos xuntos o video que preparou o equipo das TIC coa canción "Eu teño alguén no meu corazón ", de María Fumaça. 
En galego e con lingua de signos.

Sen ti non hai recreo

Este ano, o alumnado de terceiro e de sexto de primaria participaron no proxecto que a ONCE ofrecía baixo o lema "Por un recreo inclusivo. Por min e por todos os meus compañeiros"

É un programa de sensibilización que axuda a fomentar valores como a solidariedade e o pensamento crítico, o papel activo do alumnado e o traballo colaborativo, para conseguir igualdade de oportunidades paa todas as persoas.

No  patio de recreo alumnos de distintas idades interactúan cos seus iguais nun espazo, poñendo en práctica as habilidades de negociación e mediación de conflictos entre eles.

Como se podería cambiar o patio para mellorar a accesibilidade para os alumnos que o requiran? Como se pode atender a diversidade de necesidades e intereses do alumnado?
Traballamos

Ao longo de varias sesións tratamos o tema da discapacidade, achegando ao noso alumnado a esta realidade.

Visionamos unha curta sobre a vida diaria dos nenos e nenas discapacitadas nun centro escolar cheo de barreiras para eles/as.
Analizamos por equipos o noso patio, detectando barreiras e propoñendo modificacións para que todos/as podamos xogar.
Como tarefa final creamos o noso patio inclusivo ideal.

 Estes son os carteis que elaboraron os nosos alumnos para fomentar e reivindicar a diversidade e inclusión no recreo. 

Cartel de 3EP

Audio-descripción  do cartel

Cartel de 6EP

Audio-descrición do cartel,   

Pilabots: Reciclar é cousa de todos

A reciclaxe de pilas ten premio!

Grazas a toda a comunidade educativa do cole logramos reunir case unha tonelada de pilas.
Si, si... lestes ben ... 1000 kg de pilas que, grazas  ao noso esforzo non irán a parar a ningún sitio onde contaminen o medio ambiente.
Comezamos a recollida en novembro e, coa colaboración de moita xente, logramos encher unha chea de colectores. 

Despois de pesar os colectores de todos os colexios participantes farán un ranking de quilos recollidos por centro e por alumno. Desa maneira coñeceremos os centros gañadores.

Visitade a páxina da campaña picando na imaxe de embaixo

O sabor da aventura está no mar

O noso centro está a participar nos Plans Proxecta da Xunta de Galicia. Un deles chámase "Aliméntate ben" e unha das campañas que o compoñen é "O sabor da aventura está no mar".
Por iso, o xoves pasado visitáronnos o mariñeiro Luis e a mariscadora Mariña que nos falaron das propiedades do peixe.
Ademais de darnos a coñecer a importancia que na nosa dieta teñen os produtos do mar,  tamén nos amosaron  algunhas das especies que viven nos nosos mares e aprendemos a importancia que teñen as profesións que están relacionadas co mar.
Tamén vimos que é moi importante manter en bo estado o medio mariño e protexer as especies que viven nel.
Sabiades que hai peixes que son bos para medrar? E que hai outros que son bos para a vista ou para a intelixencia ? 
Todo isto  e moito máis está no libriño que recibimos como agasallo. 
Nel tamén atoparedes a historia dos Arroases, uns personaxes que teñen superpoderes grazas a comer peixe.
Ademáis, podedes acceder á páxina web da campaña, onde atoparedes xogos, saborosas receitas de cociña ...

Receitas con sabor a PAZ

 A boa alimentación é fundamental para unha vida sa. 

Por iso nos metemos na cociña  para elaborar unha serie de receitas que deberían aparecer en calquera libro de cociña que se precie!

Empregamos os mellores ingredentes e, por iso, as nosas receitas son moi apetecibles : arrecenden a respecto, saben a agarimo e ao final deixan un lixeiro regusto a amizade ...
Tratade de preparalas na casa.
Hai para todos os gustos....

A paz está nos contos

A PAZ tamén está nos contos.
Hai contos que falan da solidariedade, de compartir, de perdoar ...
 E iso foi o que nos mostrou o mestre e contacontos Fran Guede, invitado pola AFA do cole.
Contou historias, cantou cancións, fixo que os nenos e nenas participaran ...

 Todo un éxito, vaia!

A paz esta nas nosas mans

Construir a PAZ é   tarefa de todas e todos. 

Na escola todos os días se traballan valores coma o respecto ás diferenzas , a solidariedade, a tolerancia , a empatía ...
E o día 30 de xaneiro é un día máis,  pero propoñendo actividades  que fagan visible o noso sentir.
Todas as nenas e nenos debuxaron as súa man  e escribiron nelas mensaxes  de PAZ.
Escoitamos e cantamos cancións , vimos curtas e limos contos que nos axudaron a reflexionar sobre o tema.

Papa Noel

O Concello de Toén invitou a Papá Noel para que viñera coñecer en directo os desexos das nenas e nenos do cole antes de comezar as vacacións de inverno.
E así o fixo. 
Aparcou o trineo nos arredores do cole e... veu cargadiño de agasallos. 
GRAZAS e... esperámoste o ano que ven!

ChegouPapaNoel by Slidely Photo Gallery

Nadal cinéfilo

Como bos afeccionados ao cine que somos, non podiamos deixar pasar estas datas sen invitar aos nosos personaxes preferidos a que viñeran ao cole. 
E, aínda que vos pareza unha idea imposible... o Nadal é o que ten... 
Ata aquí se achegaron Brancaneves (sen ananiños, porque dixo que non necesitaba compaña...), a Pequena Serea (que quedou a remollo no río) Dorothy e Toto, o Espantallo, o León e o Home de folladelata (en vez de iren a OZ, dirixíanse a Belén); a Bela Dormente (aínda debe estar metida na cama ), a Bela e a Besta, e ata Drácula . Tamén vimos de cerca aos protagonistas de "Mascotas", a Cincenta na súa carroza e a Peter Pan, o capitán Garfo e Campaiña voando, a Mary Poppins...
E non podía faltar o  ultimo superheroe coñecido... Súper López 
Todos apareceron para formar parte da nosa decoración navideña en forma de bolas para a árbore de Nadal e en forma de figuras do nacemento.
Había tamén uns códigos QR que enlazaban coas películas e puidemos ver un cachiño de cada unha delas nas tablets.


Nadal2019 by Slidely Slideshow

A decoración do comedor tamén estaba moi "currada"... Ademáis da árbore, decorada con productos de alimentación, Sara , axudada polo seu home,  fixo un trineo tirado por un reno onde ía Papá Noel cargadiño de agasallos. 
 Gañamos o 2º premio do concurso organizado polo Concello de Toén...Non vos digo máis...

Ler, no Nadal tamén

Estas son as recomendacións de Efrén para estes días nos que, teremos moooito tempo libre,  mentres agardamos a chegada do Apalpador, Papá Noel, Father Christmas  ou os Reis Magos .
Seguro que as horas se nos fan moito máis curtas se temos un libro nas mans.
E, para os que aínda non mandastes a carta definitiva, non esquezades pedir un libro !

LER E FACER (en tempo de inverno)

Gravamos con Braulio Bolechas

O pasado 11 de decembro Braulio Bolechas estivo no cole gravando un capítulo do seu programa Brauliotuber co que anda a percorrer todos os coles de Galicia.

O tema foi os traballos do campo. Trouxemos ferramentas e algúns produtos da horta e cantámoslle unha canción.

Estade atentos o día da emisión porque, en cada programa Braulio propón un reto, unha pregunta relacionada co tema do capítulo, e quen a acerte pode gañar un premio.
Entre todos os que contesten correctamente sortearase… un curso de inglés dos Bolechas!

Parabéns aos premiados

Celebramos os 40 anos da Constitución participando no concurso "Unha constitución para todos".
Os premios entregáronse o día 6 de decembro no Auditorio Municipal. 


Noraboa a Marc, Gael e Iker de EI 4a; a David de EI 5a e a Alex de 3º de EP.

Parabéns a todos!